Press "Enter" to skip to content

Իվան Ահեղի գրասենյակը կուսումնասիրի Հայաստանի փորձը տուգանքների ոլորտում

ռվ
Իվան Ահեղ. «եթե 5-6 տարում հասնենք Հայաստանի հաջողությունների կեսին` շատ գոհ կլինենք»

Հայաստանի և 1565թ. Ռուսաստանի պայմանավորվածության շրջանակներում նոյեմբերի 12-ին Հայաստան կժամանանի ռուս պատվիրակությունը` տուգանքների ոլորտում Հայաստանի փորձը ավելի մանրակրկիտ ուսումնասիրելու համար: Ամենայն Ռուսիո ցար Իվան Ահեղը արդեն երկար ժամանակ է` հետաքրքվում է հայկական կողմի վարչական տուգանքների հայտնաբերման և գանձման մեխանիզմներով, այդ իսկ պատճառով Երևան է գործուղել երկրի առաջատար օպրիչնիկներին: Ռուսաստանի հիմնադիր ցարի գրասենյակը կապվել էր ՀՀ Կառավարության հետ դեռ սույն տարվա հունիսին և սկսել ուսուցողական այցի կազմակերպման շուրջ բանակցությունները: Փորձի փոխանակման ծրագրի կազմակերպման համար Կառավարությունը ստեղծել է ժամանակավոր հանձնաժողով, որը նախագահում է տրասպորտի և կապի նախարար  Գագիկ Բեգլարյանը: «Դժվարանում եմ ասել` ինչու կոնկրետ ինձ նշանակեցին նախագահ… Ինչևէ` պատրաստել ենք խիտ և հագեցած ծրագիր, որը կարծում եմ մեծապես կօգնի մեր գործընկերներին տուն տանել հայկական լավագույն փորձը», — նշեց նախարարը:

Քառօրյա այցի շրջանակներում ռուսիո օպրիչնիկները վերապատրաստում կանցնեն Ճանապարհային ոստիկանության տեսանկարահանող և լուսանկարահանող սարքերով հայտնաբերված իրավախախտումների բաժնում: «Սա ծրագրի առանցքային մասն է, քանի որ մենք 1565թ. Ռուսաստանում չենք կարողանում ապահովել ձեր տուգանքների ոչ արագությունը, ոչ ծավալը: Բացի դրանից, շատ հետաքրքրված ենք խոշոր գումարային տուգանքներով, ընթացակարգով, քանի որ մեր` ներկայիս ցիցերի հանելու ընթացակարգը վնասում է տնտեսությանը», — մեզ հետ հեռախոսազրույցում ասաց կրտսեր օպրիչնիկ Եմելյանը: Գառնի- Գեղարդ այցից հետո պատվիրակները կհանդիպեն ԴԱՀԿ գործընկերների հետ և կքննարկեն տուգանքներ չվճարելու հետևանքով նոր տուգանքներ ավելացնելու փորձը: «Ինձ մոտավորապես բացատրել են, որ Հայաստանում կարելի է կրկնակի տուգանել մարդուն, ասենք եթե սուրհանդակը առաջին տուգանքի մասին լուրը տեղ չի հասցրել: Սա հանճարեղ է», — գտնում է օպերլիազոր օպրիչնիկ Բորեսլավը:

Պատվիրակները մտադիր են Կազանում արդեն գարնանը քաոտիկ կայանած կառքերի դեմ կիրառել կարմիր գծերի ինստիտուտը, միակ խնդիրը կարմիր ներկի արտադրությունն է, որը 1565թ. Ռուսաստանում դեռ շատ թույլ է: «Իվան Վասիլյեվիչին այնքան է դուր եկել կարմիր գույնը, որ մտածում է լավ կլիներ ինչ-որ մի քաղաքում մի ամբողջ հրապարակ կարմիր ներկել», — մանրամասնեց հարկադիր կատարող օպրիչնիկ Ֆեդոտը:

Այցի վերջին օրը Ռուսիո պատվիրակությանը կհյուրընկալեն Մատենադարնում, այնուհետև «Առագաստ» սրճարանում, որտեղ հյուրերին կծանոթացնեն հայկական ջազի հետ:

3 Comments

  1. Gajaene T-S via Facebook Նոյեմբերի 6, 2014

    Mek el ete karelia knnarkeik inchi a tuganke tend arag erapatkvum u karapatkvum hanun kaxakacu oguti ee shahujti dd

  2. Hovo Karapetyan via Facebook Նոյեմբերի 6, 2014

    menak rusion che,tox amboxj ashxarhic gan orinak vercnen,techgiten sovorecnenq,te chen tesel cuyc ktanq te inchpes kareli e ays axqat u sovac yerkrum miliardner ashxatel,aysinqns petq e unenal maximum 3ban,vor ax-mert lini erkri prezident,unenas azgayin joxov yev ka-me-raaa,parzaa,,,

Մեկնաբանությունները փակ են.