ԵՐԵՎԱՆ — Կառավարությունը խոստանում է հատուցել թոշակների չափը ոչ նյութական աջակցությամբ. «Թոշակառուների իրական խնդիրը անտեսված լինելն է, ոչ թե թոշակը: Հենց այս Նոր տարուն բոլոր նախարարները կզանգեն մեր թոշակառուներին և կշնորհավորեն տոները», — բացատրեց վարչապետը:
Կառավարության հետազոտության համաձայն թոշակառուների կյանքի որակը հիմնականում իջեցնում են ոչ թե ցածր թոշակները, այլ անջիգյար թոռները, որոնք նեղություն չեն քաշում գոնե ամիսը մեկ զանգել իրենց ծեր ազգականներին:
ՀՀԿ պատգամավոր Շուշան Պետրոսյանը բացատրում է ծրագրի մանրամասները. «Մենք չենք սահմանափոկվելու միայն զանգելով: Ողջ հունվարի ընթացքում նախարարները և պատգամավորները կայցելեն թոշակառուներին և կարեկցող դեմքով կլսեն իրենց սիրտաճմլիկ, հուզական և թափակ պատմությունները Սովետի մասին»:
Տարեցների համայնքը մեծ ոգևորությամբ է ընդունել լուրը: Թոշակառու Սրափիոն Ավագյանը, 87 տարեկան, նշում է. «Էդքան պահել մեծացրել ենք, մի հատ չեն զանգում հարցնեն սաղ ենք, սաղ չենք… Շատ անշնորհակալ ազգ դուրս եկան թոռները..», — ահազանգում է ծերուկը հավելելով, — «կառավարությունը թոռան պես քաղցր բան է… եթե զանգեն իհարկե»:
ՍոցԱպ նախարար Արտեմ Ասատրյանը նշեց, որ բացի ամանորյա զանգերից, իրենց նախարարությունը ամիսը մեկ անգամ թոշակի օրը, կզանգի թոշակառուներին: «Հաշվի առնելով իրենց իսկ խնդրանքները, մենք ամեն ամսվա առաջին օրը կզանգենք, և կհարցնենք` սաղ եք, սաղ չեք: Իսկ միայնակ թոշակառուներին կայցելի Հրանուշ Հակոբյանը և կնվիրի յուրաքանչյուր թոշակառուի մեկ փոքրիկ սփյուռքահայ», — նշեց Ասատրյանը:
Ըստ անանուն աղբյուրների կառավարության կողմից ուշադրությունը լինելու է պարտադիր, բայց ոչ պարտադրված: Իսկ զանգերից հրաժարվող ծերերին կայցելի անձամբ Առաքել Մովսիսյանը և կբացատրի կառավարության ֆինանսաբյուջետային քաղաքականության սահմանափակումները:
In association with AUA “Public Opinion Shaping” group