Press "Enter" to skip to content

Մարզահամերգային համալիրը փոխանցեցին պատահական ընտրված քաղաքացու

համալիր
Հարկային ծառայությունը 1-2 ամիս կտա երջանիկ սեփականատիրոջը համալիրին ընտելանալու համար

Կարեն Դեմիրճյանի անվան մարզահամերգային համալիրը երկար խմորումներից հետո վերջապես գտավ իր նոր տիրոջը։ Հիշեցնենք, որ սկզբից այն հանվեց աճուրդի. ոչ մի գնորդ չունենալու պատճառով փոխանցվեց Պաշտպանության նախարարությանը, այնուհետ ՆՏԱԱ ինվեստմենտ գրուփին, ինչից հետո վերադարձվեց վերջինիս գոյություն չունենալու պաճառով և տրվեց պետական գույքի կառավարման վարչությանը։ Քանի որ համալիրի միայն պահպանումը տարեկան պահանջում է 261 միլիոն դրամ, համալիրը փորձեցին վաճառել List.am կայքի օգնությամբ, բայց անգամ TOP հայտարարություններում տեղադրումն ապարդյուն էր։ Ճարահատված կառավարությունը փորձեց կիրառել շենքերի մուտքերի մոտ փակցված ավանդական հայտարարությունները։ «Պատկերացրեք դա էլ չօգնեց», — պատմում է պետական գույքի կառավարման վարչության պետ Արման Սահակյանը. «մենք կարծում էինք գոնե մեկ հատ համար պոկած կլինեն, բայց ոչ։ Մարդ որ կողքից նայի, կմտածի համալիրը ոչ մեկին պետք չի»։

Երջանիկ շահողին բժիշկները նշանակել են հակադեպրեսանտներ
Երջանիկ շահողին բժիշկները նշանակել են հակադեպրեսանտներ

Կառավարության որոշմամբ համալիրի նոր սեփականատեր պատահականության սկզբունքով ընտրվեց պետական բնակչության ռեգիստրում գրանցված քաղաքացիներից մեկը։ 1979թ. ծնված Զավեն Կարենի Մեսրոպյանը այժմ համալիրի նոր սեփականատերն է։ «Ուրախ ենք, որ այս հարցը վերջապես կարգավորվեց։ Սրտանց շնորհավորում ենք պարոն Մեսրոպյանին։ Մաղարիչ էլ անգամ պետք չէ», — նշեց Սահակյանը։
Մենք փորձեցինք կապ հաստատել երջանիկ շահողի հետ և մեզ հետ զրույցում նա խոստովանեց, որ շահումը անակնկալի բերեց թե՛ իրեն, թե՛ ողջ ընտանիքին։ «Ճիշտն ասած չգիտեմ ինչ պետք է անեմ համալիրի հետ, ես ինքս ատամնաբույժ եմ ու երբեք չեմ ունեցել համալիր»։ Պատահական ընտրված քաղաքացուն մտահոգում է տարեկան 261 միլիոն դրամ հայթհայթելու առաջացած խնդիրը. «չգիտեմ ինչ անեմ, կամ պետք է վարկ վերցնեմ, կամ մի 400–500 երիկամ վաճառեմ», — անկեղծացավ Մեսրոպյանը։

5 Comments

  1. Հեսա համալիրը կդարցնի կլինիկա, 261 մլն դր ինչա տարեկան , չի կարա 261 մարդ բուժի կամ վիրահատի, էլ ինչիա գլուխը բռնել

  2. Hayk Nahapetyan via Facebook Hayk Nahapetyan via Facebook Փետրվարի 28, 2016

    Հարց իսկ ինչու համալիրը չէն բաժանում մասերի ու վարցով տան։ Ասենք էս մաս էսքան մյուս մաս էտքան։ Գոնե ծախս կհանի. 500/մաս ու ամեն մասի արժեքը 1000 դոլար։։ Եթե օրեկան վարձեն ավելի շատ կլինի։։ Հաստատ Սենց համալիրը իր արեժքով բավականին ցածրա եթե համեմատես դրսի գների հետ

  3. Valeri Payser-khalapyan Valeri Payser-khalapyan Փետրվարի 29, 2016

    ԱՄԵՆԱՑԻՆԻԿ ԲԱՆՆ Է,ՈՐ ԵՐԲԵՎԻՑԷ ԿԱՐԴԱՑԵԼ ԵՄ:

Մեկնաբանությունները փակ են.