Այսօր կայացած ասուլիս-հաշվետվությանը Երևանի ավագանին ներկայացրեց 2014թ. ձեռքբերումներն ու կատարված աշխատանքը: Ավագանիները խոսեցին ոչ միայն ձնամաքրման, ասֆալտապատման, բակերի բարեկարգման ծրագրերից, այլև ակնարկեցին ևս մի հետաքրքիր փաստ: Մարգարիտա Կանաչյանի հայտարարությունը ապշեցրեց դահլիճում հավաքված լրագրողներին. «Անցած տարի մեր ջանքերով հնարավոր է դարձել փրկել Երևանը զոմբի ապոկալիպսիսից»: Ավագանու խոսքով` Երևանը զոմբի ապոկալիպսիսից փրկելը չափազանց դժվար էր, ենթադրում էր քրտնաջան աշխատանք, հաճախ մինչև ժամը 8-9-ը գրասենյակում մնալ, բաց թողնել ընդմիջումը, բայց ավագանիները անկոտրուն էին: «Ասեմ ավելին, երկու անգամ ենք քաղաքը փրկել զոմբի ապոկալիպսիսից` մի անգամ ապրիլին, մյուսը, կարծեմ նոյեմբերի վերջ, դեկտեմբերի սկիզբ»: Ավագանիները հրաժարվեցին մանրամասնել միջադեպերը` շեշտելով, որ չեն կարող պատմությունը ամբողջովին պատմել մեր իսկ անվտանգության նկատառումներով: «Ես էլ շատ կուզեի ասել, ոնց ենք փրկել, ինչ էր մեզ սպառնում, բայց չեմ կարող բացել փակագծերը, ուղղակի պետք է կուրորեն հավատաք ձեր ավագանուն», — նշեց Երևանի մեկ այլ ավագանի Դանիել Դիքսոնյանը:
Զոմբի ապոկալիպսիսի կանխումը կարող է վերջապես կոտրել տարածված կարծրատիպը, թե ավագանին պարապ, անիմաստ մարմին է, որը միայն հաստատում է քաղաքապետարանի արդեն իսկ կայացրած որոշումներն ու նախագծերը: Սա նաև նշանակում է, որ հաջորդ ՏԻՄ ընտրություններին երևանցիները պետք է ավելի կշռադատված որոշում կայացնեն քվեաթերթիկ լրացնելիս: «Էլի, մանրամասները չեմ բացահայտել, բայց եթե մի քանի դիպուկահար ավագանի ունենայինք, կամ գոնե արբալետին տիրապետող ավագանի, հենց ապրիլին վերջ կտայինք զոմբի ապոկալիպսիսին», — հավելեց Մարգարիտա Կանաչյանը: Ավագանին չի բացառում, որ տարեսկզբին զոմբիների հրոսակախումբը կրկին Երևանի փողոցները հեղեղելու փորձեր կանի, ուստի նրանք կոչ են անում անվերապահորեն վստահել իրենց և մի փոքր էլ մեծացնել մարմնի լիազորությունները` թույլ տալով առանց դատարանի որոշման գլխատել զոմբիների կողմից կծված, բայց դե յուրե դեռ ՀՀ քաղաքացի հանդիսացողներին:
Ибр шатек имаэл зомбиек,аранц этэл енканенк цаквум вор дебиланумек ел инч зомби??
)))))
shat sirume em dzer haghordume ev hodvatsnere baic karcum em hima humori hamar harmar jamanak che
Ձեռի հետ-ոտի վրա 2 հատ վրիպակ/տառասխալ տեսա, ասեմ, էլի.
անկոտրուՄ, զեղՉ