Քաղաքապետարան-երևանցի կապը կամրապնդվի դանիացիների միջոցով

Երևանի քաղաքապետարանի հասարակայնության հետ կապերի պատասխանատու Էլմիռ Հակոբյանը այսօր մամլո ասուլիսի ժամանակ հայտարարել է, որ քաղաքապետարանը բացել է դիմում-բողոքների ընդունման գրասենյակ։

«Վերջերս տեղեկացանք, որ երևանցիների մի մասը դժգոհ է մեր աշխատանքից, ինչպես օրինակ նույն փողոցների բազմաասֆալտապատումից կամ Հյուսիսայինի շինարարության թվացյալ անվերջությունից։ Հատուկ այդ բողոքների համար էլ մենք բացել ենք գրասենյակը, որ մարդիկ հնարավորություն ունենան արտահայտվելու` ի նպաստ մեր քաղաքի»։

Գրասենյակը սկսել է գործել սեպտեմբերի սկզբից: Այն կահավորված է և հագեցած է նորագույն տեխնիկայով, համակարգչային և ծրագրային նորագույն տեսակներով: Առավել մատչելիության համար գրասենյակը կառուցել են առավել մարդաշատ և հեշտ հասանելի թաղամասերից մեկում` Մեղրիի «Շուստրիկ» վարչական շրջանում:

«Առաջին հայացքից կարող է թվալ, որ գրասենյակի աշխարհագրական դիրքը լրացուցիչ անհարմարություններ կարող է ստեղծել, սակայն մենք դա էլ ենք հաշվի առել ու գրասենյակը կառուցել ենք Մեղրիի ամենակենտրոնական հատվածում, որտեղ Մեղրիի ցանկացած ծայրամասից կարելի է հինգ րոպեում հասնել ոտքով: Սա կօգնի առանց բարդությունների գտնել այն նույնիսկ քաղաքին անծանոթ մարդկանց»։

Գրասենյակի աշխատանքները կարգավորելու է Դանիայից հատուկ ժամանած փորձագետների խումբը։ Փարձագետները օրը 24 ժամ ընդունելու են Երևանցիներին, և, ըստ Հակոբյանի, ոչ մի դիմում անտեսված չի մնա։ Դանիացի մասնագետները մանրամասն կծանոթանան յուրաքանչյուր դիմումին, իսկ արդեն 2017-ից կսկսեն հասկանալ բովանդակությունը հայերեն լեզվով:

«Դեռևս կան խնդիրներ, օրինակ ինտերնետ չունենք, բայց դրանք լուծվող հարցեր են։ Կարևորն այն է, որ գրասենյակի շնորհիվ քաղաքապետարանը ավելի քան երբևէ մոտ կլինի երևանցուն ու նրա խնդիրներին»,- նշեց Հակոբյանը։

Երևանի բնակիչ, 52-ամյա ինժեներ Դավիթ Ջաջուռյանը մեզ հետ զրույցում նշեց, որ փորձել է կապ հաստատել գրասենյակի հետ։ «Հեռախոսը վերցրեց մի դանիացի, ով իմ բոլոր հարցերին պատասխանում էր «ձեր զանգ լինել շատ կարևոր մեզ համար»»,- պատմում է փոքր-ինչ վրդովված քաղաքացին։

Էլմիռ Հակոբյանն իր հերթին նշեց, որ տեղյակ է խնդրին. «Այո, մեր մասնագետները դեռևս չեն յուրացրել հայերենը, ինչը, սակայն, չի կարելի մատի փաթաթան սարքել։ Կարևորը արդյունքն է և առաջընթացը` կա գրասենյակ»։

Երևանի մեկ այլ քաղաքացի` 64-ամյա տիկին Ալլան պատմեց, որ 4 ժամից ավել թակել է գրասենյակի դուռը, սակայն բացող այդպես էլ չի եղել։ Սրան ի պատասխան` Էլմիռ Հակոբյանն արձագանքեց. «Երևի ընդմիջման ժամին եք գնացել։ Բնական է, որ բացող չկար։ Եւ ընդհանրապես` պետք չէ միանգամից քննադատել, գրասենյակը նոր է, մանր խնդիրներ միշտ էլ լինում են։ Չմոռանանք, որ սա նաև մարդասիրական ծրագիր է, և գրասենյակի աշխատողները Դանիայից ժամանած խուլ ուսանողներ են. պետք է տոլերանտ գտնվել ու հարգել դիմացինին»։

Քաղաքապետարանում նաև խոստացան, որ եթե գրասենյակի ծանրաբեռնվածությունը գնալով ավելանա, կբացեն նաև երկրորդը` երկարատև հերթերից խուսափելու համար։ Երկրորդ գրասենյակի բացումը, որը կլինի գարնանը, ի սկզբանե պլանավորվում էր Կուտաիսիյում, բայց հաշվի առնելով այդ քաղաքի անհեթեթ հեռավորությունը Երևանից, այն կբացվի Կապանում կամ Նոյեմբերյանում։