Ինգան և Անուշը կներկայացնեն 4 անգամ ավելի հայրենասիրական երգ

ՉՔՆԱՂ ԵՐԵՎԱՆ — Ինգա և Անուշ Արշակյանները պատրաստվում են հանդիսատեսի դատին ներկայացնել «Հայաստան իմ Հայաստան, օ Հայաստան ջան» երգը: Քույրերը նշում են, որ այս անգամ իրենց հաջողվել է ձայնագրել կվինտէսենցիալ հայրենասիրական երգը: «Մեր չափումները հաստատել են, որ երգը չորս անգամ ավելի հայրենասիրական է, քան ցանկացած մեր առանձին վերցված նախորդ երգ», — հավաքված լրագրողներին տեղեկացրեց Ինգան: Երգչուհիների խոսքով երգը առաջին վայրկյանից հայրենասիրական հույզեր է առաջացնում անգամ ամենահեռավոր սփյուռքում ապրող հայերի մեջ: «Լեռներ», «հայ» և «ազգ» բառերը կրկնվում են ռեկորդային 62 անգամ, սակայն ավելացվել են նաև նախկինում երբեք չօգտագործված բառեր, օրինակ` «Տիգրանակերտ», «սառը պուլպուլակ», «սխտորմածուն», «նամուս» և այլն: Իսկ արդեն ավանդական և սիրված «Հայաստան», «հող», «Արարատ», «սուրբ», «սփյուռք», «կարոտ», «փառք» և «վիշտ» բառերը օգտագործվել են ոչ միայն երգի կուպլետներում, այլև կրկներգում:

«Այս մոտեցումը բացահայտեցինք վերջերս, երբ պատրաստվում էինք ներկայացնել «Հայ» երգը. խոսքերի հեղինակը առաջարկեց վերանվանել երգը «Հայ, հայ», և արդյունքում կրկնակի լավ երգ ստացվեց, երկու անգամ ավելի շատ սիրվեց սփյուռքում», — ասաց Անուշ Արշակյանը:

Փողոցում անցկացրած մեր հարցումները ցույց տվեցին, որ ազգաբնակչությունը անհամբեր սպասում է Հայաստանի մասին նոր երգին: «Լուրջ Հայաստանի մասին ա՞: Ուռա՛: Ասե՛ք, ասե՛ք, որտե՞ղ է այդ սկավառակը վաճառվում», — մեզ չասաց ոչ մի անցորդ, սակայն մեկը վստահեցրեց, որ միջին ոգևորություն է ապրում. «Թող լինի էլի, հիմա երգա, պետք կգա: Կարծեմ 1000-րդ երգն ա Հայաստանի մասին…էս տարի»:
Մեր հարցին, թե ինչպես են երգչուհիները հետագայում պատրաստվում գերազանցել այս նվաճումը, քույրերը ակնարկեցին, որ մոտ ապագայում կարող են իրենց դուետին ավելացնել ևս երկու Արշակյան քույր: