Սյունիքի մարզպետի հարձակման գործը կարող է «հայրական ապտակ» որակվել

ԵՐԵՎԱՆ — Մի քանի օր առաջ «Մարիոտ» հյուրանոցում Սյունիքի մարզպետի և կին գործարարի միջև տեղի ունեցած ֆիզիկական միջադեպը նոր զարգացումներ է ստանում: Հիշեցնենք, որ տեսնելով հյուրանոցում գործարար Սիլվա Համբարձումյանին` ՀՀԿ մարզպետ Սուրիկ Խաչատրյանը էմոցիոնալ իրարանցման մեջ է հայտնվել, որի արդյունքում տեղի են ունեցել ոտքով և ձեռքով հարվածներ կնոջ ուղղությամբ:

ՀՀ գլխավոր դատախազության հատուկ քննչական մարմինն արդեն սկսել է գործի ուսումնասիրությունը և պարզել, որ հարվածներն ավելի շատ խրատաքննադատական բնույթ են կրել:

«Հասկանալի է, որ անծանոթ մարդու, մանավանդ` եվրոպացու համար կնոջը տփելը կարող էր ինչ-որ տեղ կոպիտ թվալ: Սակայն այս գործն ունի բազմաթիվ շերտեր, որոնք ակնհայտ են դարձնում, որ մարզպետին մեղադրելն արդարացի չէ»,- բացատրեց ավագ քննիչ Ահարոն Չարաբաստյանը:

«Նախ` կնոջ դեմքին դնգցնելիս պարոն Խաչատրյանի ձեռքը լուրջ վնասվել է կնոջ` անզուշորեն բարձրացրած արմունկի պատճառով: Այսինքն` երկու կողմերն էլ միմյանց վնաս են հասցրել: Էլ չեմ ասում, որ մինչև հիմա Խաչատրյանի ձեռքը ահավոր մզզում է ցավից»,- ավելացրեց քննիչը:

Բացի դրանից` իրավապահները ծեծկռտուքը դիտարկում են Սիլվա Համբարձումյանի` մի քանի օր առաջ արած հայտարարությունների լույսի ներքո, ինչը «գործն անմիջապես բերում է հայրական ապտակի համատեքստ»:

Սկանդալը մեկնաբանել է ՀՀԿ պատգամավոր Գալուստ Սահակյանը, որը կնոջ մեղադրանքը սև ՓիԱռ է անվանել:

«Եկեք չմոռանանք, որ մենք պահպանողական ազգ ենք և ընդամենը 20 տարվա անկախ երկիր ենք»,- նշել է պատգամավորը: «Իդեալական մարդ գոյություն չունի… Մարզպետը պարզապես իր դժգոհությունն է արտահայտել կնոջ մեղադրանքների նկատմամբ… Գուցե մի փոքր էմոցիոնալ է դա արել, բայց դա դասական հայրական ապտակի սահմաններից դուրս չէր: Ասեմ ավելին` մարզպետն արդեն 2 տարի է, ինչ դաժանորեն մարդ չի ծեծել»:

Քաղաքական փորձագետ Գրիգոր Դանիելյանը կարծում է, որ միջադեպը դժվար ընտրության առաջ է կանգնեցրել ՀՀԿ-ին. «Իհարկե, միջադեպը հայրական ապտակի հետ կապելը գայթակղիչ է, բայց եկեք չմոռանանք նաև ոտքով հարվածի մասին, ինչը միանգամից հարցը տեղափոխում է ‘հարբած ամուսնու ապտակի’ ֆորմատ, իսկ սա արդեն ավելի լուրջ է»:

«Մյուս կողմից` ՀՀԿ-ն կարող է որոշել ևս մեկ հոգով համալրել նախընտրական շտաբը, որը դարձել է պաշտոնյաներին անկյուն կանգնեցնելու հիմնական վայրը»:

Աղբյուրների համաձայն` գործը կարող է վերաորակավորվել որպես «ինքնապաշտպանություն», եթե քննչական մարմինները Սիլվա Համբարձումյանի վրա գտնեն սուր զարդեր կամ գռեհիկ զգեստ, որը կարող էր սադրել հանրապետական մարզպետին:

Այս նյութը պատրաստվել է ՎԿԱ ծրագրի շրջանակներում – EBG Disclaimer