Press "Enter" to skip to content

Գագիկ Բեգլարյանը կարող է վերադառնալ «ջղայնության կառավարման» դասընթացից և վերաբրենդավորումից հետո

Նախկին քաղաքապետը կարող է վերադառնալ դրական կերպարի իմիջով

ԵՐԵՎԱՆ — Երևանի նախկին քաղաքապետ Գագիկ Բեգլարյանը կարող է քաղաքականություն վերադառնալ «ջղայնության կառավարման» դասընթացին մեկ տարի մասնակցելուց հետո: Այն ավարտվում է դեկտեմբերի 8-ին: Ինչպես հաղորդել են քաղաքապետարանին երեկոյան ժամերին մոտ կանգնած աղբյուրները, նա արդեն մի քանի անգամ այցելել է հին աշխատատեղ և ժպտալով դուրս եկել:

Հիշեցնենք, որ նախկին քաղաքապետի հանրային իմիջը զգալի վնաս կրեց 2010թ. վերջին` նախագահական նստավայրի աշխատակիցներից մեկին տփելու արդյունքում: Միջադեպին հետևվեց «ջղայնության կառավարման» մեկ տարվա դասընթաց, որտեղ ոլորտի լավագույն մասնագետները փորձում էին ՀՀԿ բարձրաստիճան պաշտոնյային հետ սովորեցնել մարդկանց տփելուց:

«Պարոն Բեգլարյանը լուրջ առաջընթաց է գրանցել մարդկանց վրա չհարձակվելու հարցում, և կարծում եմ` մինչև տարվա վերջ արդեն լիարժեք կկարողանա զբաղվել կարևոր պետական գործերով առանց այլ գերատեսչությունների աշխատակիցներին ֆիզիկական վնաս պատճառելու»,- նշում է դասընթացների համակարգող, հոգեբան Կարինե Նալչաջյանը:

«Պարոն Բեգլարյանը ունի մարդկանց չտփելու լուրջ պոտենցիալ, որը պետք է զգուշորեն օգտագործել», - ՀՀ հոգեբան

«Նա լուրջ հաջողությունների է հասել և դասընթացի երկրորդ ամսից սկսած` արդեն չէր հարձակվում դասախոսների վրա, իսկ վերջերս չի ծեծում նույնիսկ պահակին: Կարծում եմ` նա պատրաստ է վերադառնալ երկրի շենացման աշխատանքներին»,- կիսվում է հոգեբանը:

Սակայն քաղաքական տեխնոլոգների կարծիքով` նրան դեռ անհրաժեշտ է որոշակի վերաբրենդավորում` ավելի բարի կերպար ստեղծելու համար: Փի-Առ-ի մասնագետները մշակել են իմիջային փոփոխության 4 քայլ, որոնք դրական ասոցիացիաների միջոցով կհեշտացնեն նրա վերադարձը մեծ քաղաքականություն.

1.  Նախատեսվում է նոր, ավելի բաց լուսային գամմայի հետ ասոցացվող մականուն, որպեսզի այդքան ակնհայտորեն չասոցացվի չարիքի հետ:

2.  Նա պետք է անընդհատ երևա ժպտացող և իրենից չսարսափող  երեխաների ֆոնին, որպեսզի մարդկանց մոտ ստեղծվի տպավորորություն, որ նրա մեջ կա ինչ-որ լավ բան:

3.  Հաջորդ փուլում նա պետք է ամրապնդի մարդկանց մեջ այն համոզմունքը, որ նրա մեջ ինչ-որ լավ բան կա` այրվող տնից փրկելով մի քանի երեխա, մեկ տատիկ և ցանկալի է նաև առնվազն մեկ փոքրիկ փիսոյի:

4.  Այս փուլում նա պետք է այցելի Պլասիդո Դոմինգոյի հաջորդ համերգին, որի ավարտին   դեմոնստրատիվ չծեծի ոչ մեկին:

Անընդհատ իրենց վայրը փոխող աղբյուրների հաղորդմամբ` Գագիկ Բեգլարյանի իմիջային թիմը կարող է ավելացնել նաև 5-երորդ տարր ` պատրկերել նրան գիրք կարդալիս` սերմանելու նաև ինտելեկտուալ աշխարհի հետ կապի ասոցիացիան:

 

Այս նյութը պատրաստվել է ՎԿԱ ծրագրի շրջանակներում – EBG Disclaimer 

5 Comments

  1. Ծովինար Ծովինար Նոյեմբերի 11, 2011

    Աաաաաաաաաաաաա … «քաղաքապետարանին երեկոյան ժամերին մոտ կանգնած աղբյուրները» :)))))))

  2. alplast alplast Նոյեմբերի 11, 2011

    «Պարոն Բեգլարյանը լուրջ առաջընթաց է գրանցել մարդկանց վրա չհարձակվելու հարցում, և կարծում եմ` մինչև տարվա վերջ արդեն լիարժեք կկարողանա զբաղվել կարևոր պետական գործերով առանց այլ գերատեսչությունների աշխատակիցներին ֆիզիկական վնաս պատճառելու» )))

  3. Անի Սմբատյան Անի Սմբատյան Նոյեմբերի 11, 2011

    Եթե այս անգամ էլ Դոմինգոյի համերգից հետո ինչ-որ մեկին չծեծի, ուրեմն հալալ ա Նալչաջյանին…

  4. Էմիլ Էմիլ Նոյեմբերի 12, 2011

    Էս Փի-Առ տեղնոլոգիան շատ հայտնի ա, սկզբից գունային գամման են լուսավորում, հետո սարքում են քնքուշ, բարի, հետո էլ թողում են երեխաների հետ խաղա, խաղա, խաղա….
    Բայց վերջը լավ չի լինում:
    Խնդրում եմ ոտնկայս հիշենք Մայքլ Ջեքսոնին

  5. Սամ Սամ Նոյեմբերի 13, 2011

    մեր քաղաքական գործիչներն ավելի լավա նման խառնվածքով լինեն, քան քծնվող ու փափկասուն… հետո էլ հազար անգամ ասեցին, որ չի տփել, այլ ապտակելա:))))

Մեկնաբանությունները փակ են.