Հայկական էստրադայի աստղերի համերգը Լուսնի վրա չի կայանալու

Դեկտեմբերի 18-ին Լուսնի վրա նախատեսված հայկական շոու բիզնեսի աստղերի համերգը չի կայանալու: Հիշեցնենք, որ Լուսնի վրա կայանալիք համերգում պետք է երգեին հետևյալ մեգա և սուպեր աստղերը` Նունե Եսայանը, Հասմիկ Կարապետյանը, էն սենց փոքր-մոքր բիլանոտ տղեն և  Արտաշ Ասատրյանը: Համերգի չեղարկման պատճառը պարզելու համար մենք կապնվեցինք աստղերի հետ: Արտաշ Ասատրյանը մեզ տեղեկացրեց, որ` «Ես տենց առարնձնապես սլուխ կամ ձայն չունեմ, բայց ոգևորված էի համերգին մասնակցելու: Բոլոր տոմսերը արդեն շատ վաղուց վաճառվել էին: Քանի որ սա մեր առաջին համերգը պետք է լիներ Լուսնի վրա, այնտեղի հայկական համայնքը անհամբեր սպասում էր մեր համերգին, էնպես որ ֆինանսական ոչ մի խնդիր չկար:»

Խոսեցինք Նունե Եսայանի հետ, ով մեզ որոշակի պարզաբանումներ տվեց` «Պատաճառը այն էր, որ նրանք մեզ չեն թողնում «պլյուս» երգել» – պատմեց վրդովված երգչուհին – «Սա, ո՞ր դարն ա, որ գնանք ու համերգին մեզ կենդանի ձայնով ճղենք: Ախր պարզից էլ պարզ ա, որ 4 երգիչ ենք, ամեն մեկիս ձայնի համար «զվուկովիկը» պետք է ամեն անգամ փոխի կարգավորումները: Բարբարոսներ…»

«Այ էդ կենդանի երգելու պահանջը ես չեմ հասկնում: Ախր, որ CD-ն միացնենք համ ավելի լավ կհնչի ձայնը, համ մեզ ավելի հեշտ կլինի, համ երաժիշտների վրա անկապ փող չենք ծախսի…Մի խոսքով մարդկանց էս կենդանի ձայնով տարվածությունը մի տեսակ անառողջ ա ինձ թվում» – ավելացրեց Հասմիկ Կարապետյանը:

«Ես տենց էլ չհասկացա ինչ եղավ, ինչի չենք գնում» – մեզ հետ զրույցում խոստովանեց էն սենց փոքր-մոքր բիլանոտ տղեն – «ինձ ընդհանրապես վերջի պահին զանգահարեցին, երբ պարզվեց, որ տիեզերանավի մեջ մի քիչ ավելորդ տեղ ա մնացել: Ափսոս, ահագին տրամադրված էի գնալուն: Ճիշտ է վտանգ կար` համերգի ընթացքում ինձ պետք է շղթայով բեմին կապեյին թույլ ձգողական ուժի պատճառով, բայց ես պարաստ էի  դրան՝ ամեն օր Լուսին չես գնում:»

Լուսնում համերգ կազմակերպած սփյուռքահայերը շարունակում են համառ մնալ և պահանջել միմիայն կենդանի հնչողություն, իսկ հայ էստրադայի աստղերը արդեն ունեն բազմաթիվ հրավերներ Գլենդելից, Հալեպից և Տավուշի մարզի Խնձորաշատ գյուղից, որտեղ հանդիսատեսը պատրաստ է վայելել մեգա և սուպեր աստղերի բերանը ռիթմիկ բացել-փակելը:
[ad#Google Adsense Horizontal]